'Sraa ‑ɛɛ poa pɛe 'a blua' 'de Kea ke nyiɔ 'nynɩ ɛ
3
‑Bo nyɔ ‑saa "nɔdɩ klae" 'sraa 'ʋn, ‑bo ɛ nɩ 'kan 'de ɔ ke Nyɔsoa 'je wlu "kpei ‑sea, "ko ɛɛ' 'beɔ ɛ‑, ‑ɩɩn" ɛɛ' 'nynɔ ɛ‑, ‑mɛ ɛɛ' ‑jɛ sea ‑kɔ ‑pʋn" nɩ, ɛmɛ ɔ 'je Nyɔsoa "nyɩ. 2 Ɔɔ muɛ sʋn 'de ɛɛ' "jru "kpei ‑tea' kpɩɩn‑, ‑wɛe ɔ 'jeɛ ‑pliɔn' cɛn, 'de ‑tan 'tan ‑ɛɛ ‑sɔn nyʋ ke Kea 'a ‑gbʋʋn' a "i 'a "juɛi. -Wɛe Aarɔn ɔ "nynuu -nɩa 'sraa -saʋn 'je ɛɛ' nmɔ "kpa 'a 'fɔ -wee' kui -fʋan. 3 Ɛɛ' 'sraadɛ tu-, ɛɛ' ‑jɛ nyɔ ɔ "nyɩa Nyɔsoa, ‑wɛe nyɔ ɔ poa "jri ɛ, ɛmɛ ‑nɩ ɛɛ' 'cna ke dɩ ‑ɩ ‑wlʋa ɛɛ' 'diidɩ kwii ɛ. 4 Ɛɛ' 'kpʋ -kwlʋtɛ 'sɔɔn ke 'cna ‑ɩ ‑nɩa ɛ kui ke, -jɩ -nɩa 'de ɛ ‑kwlʋdi' ke, ɛɛ' -kuo" -pʋn" pɛe ɩ mɩ ‑ke ɛɛ' 'kpʋ -kwlʋtɛ nyɔ ɔ ‑sa 'de mu. 5 Aarɔn ɔ' "nynuu a muɛ "jri poa' 'de 'sraa -ɛ -wee' nɛ dia "kpei, 'de nɛ ʋʋ ‑tba' 'de "kpa "kpei, ɛ nɩɛ 'sraa ‑ɛ ‑wee' nɛ di 'a, ‑ɛɛ 'nʋ a jaa Nyɔsoa 'a pɛe 'ja ‑o.6 ‑Bo ɛ nɩ "nɔdɩ mɩɩ", ɩmɩ nyɔ 'je nyɔ ke Nyɔsoa 'a wlu "kpei -sea' 'sraa ʋn ‑saa a, nyɔ 'bɛɛ' ɔ 'je ɛɛ' 'beɔ, 'de ɛɛ' 'nynɔ ‑kɔ sea ‑pʋn" nɩ to-. 7 ‑Bo ɛ nɩ 'blae nyɔ 'je 'sraa 'ʋn ‑saa, nyɔ ɔ jɛ 'de Nyɔsoa "juɛi. 8 Nyɔ ‑ɔɔ jɛ ɔɔ muɛ kwa "jru ‑tea' kpɩɩn‑, ‑wɛe ɔ 'jeɛ ‑pliɔn' cɛn, 'de ‑tan 'tan ‑ɛɛ ‑sɔn ʋʋ ke Nyɔsoa 'a ‑gbʋʋn' a "juɛi, ‑wɛe Aarɔn ɔ' "nynuu 'je ɛɛ' nmɔ "kpa 'a 'fɔ ‑wee' kui ‑fʋan. 9 Dɛ nyʋ 'jea ɛɛ' wlu "kpei ‑sea 'sraa dɛ tu ‑pʋn" ‑sa, nyʋ 'jea Nyɔsoa "nyɩ ‑wɛe ‑ɛ ‑wee' nɛ 'jea di, ɛɛ' 'fɔ ‑blea 'cna: Ɛɛ' ku nyɔ cɛan 'de ɛɛ' ‑gbookpa ‑pʋn", ɛɛ' 'cna ‑nɩa 'de ɛɛ' mɩ ke -jɩ -nia 'de ɛɛ' 'diidɩ kwii ke-, 10 Ɛɛ' 'kpʋ -kwlʋtɛ 'sɔɔn ke 'cna ‑ɩ ‑nɩa ɛ kui ke, -jɩ -nɩa 'de ɛ ‑kwlʋdi' ke, ɛɛ' -kuo" -pʋn" pɛe ɩ mɩ ‑ke ɛɛ' 'kpʋ -kwlʋtɛ nyɔ ɔ ‑sa 'de mu. 11 'Sraa ‑sai 'a muɩ "jri pooa' 'de "kpa "kpei: Ɛ nɩɛ diidɛ nyɔ "nyɩa Nyɔsoa nɛ dia ‑o.
12 ‑Bo ɛ nɩ -gbao nynɔ nyʋ 'je 'sraa 'ʋn ‑saa, nyɔ ɔ jɛ 'de Nyɔsoa "juɛi. 13 Ɔɔ muɛ ɛɛ' nmi tu kwa "jru ‑tea' kpɩɩn‑, ‑wɛe ɔ 'jeɛ ‑pliɔn' cɛn, 'de ‑tan 'tan ‑ɛɛ ‑sɔn nyɔ ke kea 'a ‑gbʋʋn' a "juɛi, ‑wɛe Aarɔn ɔ' "nynuu 'je ɛɛ' nmɔ "kpa 'a 'fɔ ‑wee' kui ‑fʋan. 14 Ɛɛ' 'fɔ nyʋ 'jea Nyɔsoa "nyɩ ‑wɛe ‑ɛ ‑wee' nɛ 'jea di ɛ, ɛɛ' 'cna ke dɩ ‑ɩ ‑nɩa ɛɛ' 'mɩ kwii, 15 Ɛɛ' 'kpʋ ‑kwlʋtɛ 'sɔɔn ke, 'cna ‑ɩ ‑nɩa ɩ kwii ke, 'de -jɩ -nea ɛ ‑kwlʋdii' ke-, ɛɛ' -kuo" -pʋn" pɛe ke ɛɛ' 'kpʋ ‑klwʋtɛ nyɔ ɔ ‑sae' mu. 16 'Sraa ‑sai 'a muɛ ɛɛ' kpi "jri poa', 'de "kpa "kpei, ɛ nɩɛ diidɛ nɛ dia, ‑wɛe ‑ɛɛ 'nʋ a jaa Nyɔsoa 'a pɛe ja. 'Cna ‑wee' nɩɛ Nyɔsoa 'a dɛ ‑o. 17 Kɛ' dee jrɛ' ka aoa' "ji 'a "ji a mu wɔn 'jea, ʋʋ sɩɛ ‑saa i ‑ta "oo ‑ta aoa mua "tia', ao se nmi 'a 'cna ke ɛɛ' nmɔ dii.